English| മലയാളം

ചരിത്രം

സാമൂഹ്യ-സാംസ്കാരിക ചരിത്രം

 
പാലാ നഗരം ഉള്‍പ്പെടുന്ന മീനച്ചില്‍ താലൂക്ക് പുരാതനകാലത്ത് തെക്കുംകൂര്‍, വടക്കൂംകൂര്‍ എന്നീ രാജ്യങ്ങളുടെ ഏതാനും ഭാഗങ്ങള്‍ വരേയും, മീനച്ചില്‍, പൂഞ്ഞാര്‍ എന്നീ നാട്ടുരാജ്യങ്ങള്‍ വരേയും വ്യാപിച്ചുകിടന്നിരുന്നു. എ.ഡി 800 മുതല്‍ 1102 വരെ ഈ പ്രദേശം കുലശേഖര സാമ്രാജ്യത്തിന്റെ അധീനതയിലായിരുന്നു. എ.ഡി 1100-ല്‍ കുലശേഖര സാമ്രാജ്യം വിഭജിക്കപ്പെട്ടപ്പോള്‍ തെക്കുംകൂര്‍, വടക്കുംകൂര്‍ എന്നീ രാജ്യങ്ങള്‍ രൂപം കൊണ്ടു. തുടര്‍ന്ന് 1749 വരെ ഏറെക്കാലം ഈ പ്രദേശം തെക്കുംകൂറിന്റെയും, വടക്കുംകൂറിന്റെയും അധീനതയിലായി. 1749-ല്‍ തെക്കുംകൂറിനെയും പിന്നീട് വടക്കുംകൂറിനെയും മാര്‍ത്താണ്ഡവര്‍മ്മ ആക്രമിച്ചു കീഴടക്കി തിരുവിതാംകൂറിനോട് കൂട്ടിച്ചേര്‍ക്കുകയുണ്ടായി. വടക്കുംകൂറും തെക്കുംകൂറും അധീനതയില്‍‌പെടുത്തി വച്ചിരുന്ന പൂഞ്ഞാര്‍ , മീനച്ചില്‍ എന്നീ ചെറുരാജ്യങ്ങളും അതോടെ തിരുവിതാംകൂറിന്റെ ഭാഗമായി. തമിഴ്നാട്ടില്‍ നിന്നും കുടിയേറിപ്പാര്‍ത്ത ചെട്ടിയാന്‍മാരാണ് പാലാ കമ്പോളം പണികഴിപ്പിച്ചത്. 1736-ല്‍ നാടുവാണിരുന്ന മീനച്ചില്‍ കര്‍ത്തായാണ് പാലാ അങ്ങാടി സ്ഥാപിച്ചത്. കുരുമുളകും ഇഞ്ചിയും ഏലവും മറ്റു സുഗന്ധദ്രവ്യങ്ങളും ഇവിടെ നിന്നും വിദേശങ്ങളിലേക്ക് പുരാതനകാലം മുതലേ കയറ്റി അയച്ചിരുന്നു. തീര്‍ത്ഥാടന കേന്ദ്രമായ ഭരണങ്ങാനത്തേക്കും സുഖവാസകേന്ദ്രങ്ങളായ കുരിശുമലയിലേക്കും, ഇലവീഴാപൂഞ്ചിറയിലേക്കുമുള്ള പ്രധാന ഗതാഗതപാത പാലയിലൂടെയായിരുന്നു കടന്നുപോയിരുന്നത്. വ്യവസായകേന്ദ്രമായ പെരുമ്പാവൂരിലേക്ക് പാലാ വഴി റബ്ബര്‍ തടികള്‍ കടത്തിയിരുന്നു. പാലാ നഗരപ്രദേശത്തെ ഏറ്റവും പുരാതനമായ പാതയാണ് എം.പി റോഡ്. മുന്‍കാലങ്ങളില്‍ പാലായും ആലപ്പുഴയുമായി മീനച്ചില്‍ നദിവഴി വാണിജ്യബന്ധം ഉണ്ടായിരുന്നു. പാലാ സെന്റ് തോമസ് പള്ളിമേടയില്‍ 1896-ല്‍ സ്ഥാപിക്കപ്പെട്ട സെന്റ് തോമസ് സ്ക്കൂള്‍ ആണ് പാലായിലെ ആദ്യ വിദ്യാഭ്യാസ സ്ഥാപനം. 1921-ല്‍ സെന്റ് തോമസ് സ്കൂള്‍ ഹൈസ്കൂളായി ഉയര്‍ത്തപ്പെട്ടു. 1909-ല്‍ കണ്ണാടിയുറുമ്പില്‍ മഠത്തിന്റെ നേതൃത്വത്തില്‍ ആരംഭിച്ച സ്കൂള്‍ 1921-ല്‍ മിഡില്‍ സ്കൂളായി ഉയര്‍ത്തപ്പെട്ടു. ളാലം പുത്തന്‍ പള്ളി, ളാലം കുരിശു പള്ളി, സെന്റ് എഫ്രം പള്ളി, സെന്റ് ജോസഫ് പള്ളി, സെന്റ് തോമസ്സ് പള്ളി, അരുണാപുരം, പാലാ വലിയ പള്ളി, 1683-ല്‍ സ്ഥാപിച്ച ളാലം പഴയ പള്ളി, പുരാതനമായ പെരുമാള്‍ ക്ഷേത്രം, ആനക്കുളങ്ങര ഭഗവതിയമ്പലം, ശ്രീകോവില്‍ ആനക്കുളങ്ങര ക്ഷേത്രം, ളാലം മഹാദേവക്ഷേത്രം, പുതിയകാവ് ദേവീ ക്ഷേത്രം, തൃക്കയില്‍ ശിവക്ഷേത്രം, മുരിക്കുംപുഴ ദേവീക്ഷേത്രം, വെള്ളാപ്പാട് ദേവീക്ഷേത്രം, മാര്‍‌ത്തോമാ പള്ളി, മസ്ജിദ്-ഉല്‍ -ഫലാഹ് എന്നിവയാണ് പാലായിലുള്ള പ്രധാന ആരാധനാലയങ്ങള്‍. ചരിത്ര പ്രസിദ്ധമായ പാലാ വലിയപള്ളി എ.ഡി 1002-ല്‍ സ്ഥാപിക്കപ്പെട്ടതാണ്. മഹാകവി കട്ടക്കയത്തില്‍ ചെറിയാന്‍ മാപ്പിള, മഹാകവി പാലാ നാരായണന്‍ നായര്‍ എന്നിവര്‍ക്ക് ജന്മം നല്‍കിയത് ഈ നാടാണ്. ഇന്ത്യന്‍ ഡ്രാമാസ്കോപ്പ് നാടകസമിതി, സ്റ്റേജ് ഇന്ത്യ എന്നീ നാടക സംഘങ്ങളുടെ ആസ്ഥാനം ഇവിടെയാണ്. ക്രൈസ്തവ യുവജന കലാസംഘടനയായ സി.വൈ.എം.എല്‍ ഇവിടെ സാംസ്കാരിക രംഗത്ത് പ്രവര്‍ത്തിക്കുന്ന പ്രമുഖ സ്ഥാപനമാണ്.